Прафілактыка грыпу і вірусных інфекцый

Грып — гэта інфекцыйнае захворванне, узбуджальнікам якога з’яўляецца вірус.

Сімптомы грыпу: гарачка, тэмпература цела 37,5 — 39°С, галаўны боль, боль у мышцах, суставах, дрыжыкі, стомленасць, кашаль, насмарк або закладзены нос, боль (пяршэнне) у горле.

Магчымыя ўскладненні пасля грыпу: пнеўманія, рыніт, сінусіт, бранхіт, атыт, міякардыт і перыкардыт, міязіт, паражэнні нырак, абалонак галаўнога і спіннога мозга, сасудаў. Таксама пры грыпе часта абвастраюцца існуючыя хранічныя захворванні.

Што рабіць пры захворванні на грып або ВРІ?

Варта застацца дома, каб не толькі не заразіць іншых, але і своечасова заняцца лячэннем, для чаго неабходна неадкладна звярнуцца да ўрача. Самалячэнне недапушчальнае. Неабходна своечасова прымаць лекі і выконваць пасцельны рэжым падчас хваробы, бо пры захворванні павялічваецца нагрузка на сардэчна-сасудзістую, лёгачную, імунную і іншыя сістэмы арганізма. Рэкамендуецца шмат піць. Пры кашлі і чханні прыкрывайце рот і нос сурвэткай або насавой хустачкай.

Для папярэджання распаўсюджвання інфекцыі  хворага варта ізаляваць ад здаровых асоб (пажадана вылучыць яму асобны пакой). Памяшканне, дзе знаходзіцца хворы, неабходна рэгулярна праветрываць, прадметы хатняга ўжытку, а таксама падлогу праці­раць дэзынфіцыруючымі сродкамі. Зносіны з хворым, па магчымасці, трэба абмежаваць. Пры доглядзе хворага на грып варта выкарыстоўваць медыцынскую маску.

Штогадовая вакцынацыя — гэта найбольш эфектыўная мера прафілактыкі грыпу. Вакцынацыя праводзіцца не пазней, чым за 2—3 тыдні да пачатку эпідэмічнага ўздыму захворвання. Своечасовая вакцынацыя зніжае верагоднасць захворвання на грып у некалькі разоў, змякчае цячэнне хваробы, скарачае яе працягласць, прадухіляе ўскладненні.

Да мер неспецыфічнай прафілактыкі грыпу адносяцца наступныя:

* У перыяд сезоннага ўздыму захворванняў на грып і ВРІ скараціце час знаходжання ў месцах з вялікай колькасцю людзей і ў грамадскім транспарце.

* Пазбягайце цесных кантактаў з людзьмі, якія маюць прыметы захворвання: чхаюць, кашляюць.

* Рэгулярна і старанна мыйце рукі з мылам, асабліва пасля кашлю ці чхання. Спіртаўтрымліваючыя сродкі для ачысткі рук таксама эфектыўныя.

* Выкарыстоўвайце індывідуальныя або аднаразовыя ручнікі.

* Рэгулярна праветрывайце памяшканне, у якім знаходзіцеся, і рабіце вільготнае прыбіранне. Пры гэтым для санацыі памяшкання рэкамендуюць прымяняць якое-небудзь эфірнае масла накшталт ядлоўцу, чайнага дрэва, эўкаліпта і хвоі (калі ў вас няма алергічных рэакцый на іх).

* Назірайце за ўзроўнем вільготнасці ў памяшканні: пры нізкай вільготнасці слізістая носа вельмі хутка высыхае і становіцца ўразлівай для нападзення вірусаў.

* Пазбягайце пераахалоджвання і перагрэву.

* Карыстайцеся маскай у месцах збору людзей.

* Павялічце час знаходжання на вуліцы (на свежым паветры).

* У перыяд эпідэміі грыпу пазбягайце абдымкаў, пацалункаў, поціскаў рук.

* Ужывайце ў ежу прадукты, якія змяшчаюць вітамін С (журавіны, брусніцы, парэчкі, лімон, ківі, кіслую капусту, салодкія балгарскія перцы і інш.), а таксама стравы з дабаўленнем часнаку, цыбулі. Піце больш вадкасці (адвары пладоў шыпшыны, узвары, вітамінізаваную гарбату, у тым ліку зялёную гарбату, сокі).

* У мэтах павышэння ўстойлівасці арганізма да рэспіраторных вірусаў выкарыстоўвайце (па рэкамендацыі ўрача) розныя прэпараты і сродкі, якія павышаюць імунітэт, у тым ліку полівітаміны.

* У выпадку з’яўлення хворых на грып у сям’і ці ў калектыве рэкамендуецца пачаць прыём супрацьвірусных прэпаратаў з прафілактычнай мэтай (па рэкамендацыі ўрача, з улікам супрацьпаказанняў і паводле інструкцыі па прымяненні прэпарату).

* Ну і вядома, вядзіце здаровы лад жыцця: паўнавартасны сон, збалансаванае, здаровае харчаванне, фізічная актыўнасць, загартоўванне, ураўнаважаны псіхаэмацыянальны стан.

Ганна САЎЧЫК,
урач-інтэрн аддзялення гігіены дзяцей і падлеткаў Цэнтра гігіены і эпідэміялогіі Ленінскага раёна Мінска.