Догляд ягадных кустоў пасля збору ўраджаю

Пасля таго як знялі ўраджай парэчак і агрэсту, не варта забываць дзесьці ў верасні падкарміць і добра апрацаваць гэтыя ягадныя кусты.

Неабходна прыбраць павуцінне, падсохлае і закручанае лісце на кожным кусце і ўсё гэта спаліць. Акрамя таго, усім ягаднікам у верасні неабходна мінеральная падкормка суперфасфатам і каліем, бо ў гэты час пачынае расці каранёвая сістэма. Для чырвоных парэчак і агрэсту дастаткова ўзяць па 1 сталовай лыжцы двайнога суперфасфату і па 2 сталовыя лыжкі калію на куст, а вось для чорных парэчак варта ўзяц­ь дзве сталовыя лыжкі двайнога суперфасфату і адну — калію. Такія ўгнаенні лепш за ўсё ўносіць перад палівам пры сухім надвор’і. Пасля даж­джу выкарыстоўваць хлорысты калій непажадана, асабліва пры падкормцы агрэсту. Кусты агрэсту могуць заўчасна скінуць лісце, асабліва пры працяглым сухім надвор’і, і гэта дрэнна адаб’ецца на каранёвай сістэме куста.

Таксама не варта ў гэты час рабіць азотную падкормку, у тым ліку настоем травы ці гною, паколькі азот будзе спрыяць росту канцоў у галінак кустоў, а новы прырост не паспее добра адраўнець і да зімы можа проста засохнуц­ь. Лепш, наадварот, спыніць рост такіх галінак. Для гэтага трэба прышчыпнуць верхавіны ў чорных парэчак і агрэсту. А вось з чырвонымі парэчкамі так рабіць не трэба, паколькі ў іх на канцах закладваецца найбольшая колькасць пладовых пупышак — для багатага ўраджаю наступнага года.

Яўген САЛАНОВІЧ,
дачнік са шматгадовым вопытам.