Бульбяныя бочачкі з грыбамі

Раю ўсім пакаштаваць посную страву з бульбы і грыбоў. Яна гатуецца без яек, без мяса і без сыру, з самых простых інгрэдыентаў, а атрымліваецца вельмі смачна і сытна. Посны рэцэпт бульбяных бочачак з грыбамі ў таматным соусе — на абед, вячэру і нават на святочны стол!

Прадукты (на 4 порцыі, у мяне дзве формы для запякання 16´18 см).

• Бульба — 600 г,
• грыбы шампіньёны — 300 г,
• цыбуля рэпчатая — 1 шт.,
• морква вараная — 1 шт.,• мука — каля 150 г,
• алей — 70 г,
• таматная паста — 2 ст. л.,
• соль — 1 ч. л.,
• цукар — 1 ч. л.,
• перац — на смак,
• праванскія травы сухія — 1 ч. л.,
• кроп свежы (для падачы на стол) — 1 пучок,
• вада кіпячоная — 200 мл.

Падрыхтоўваем неабходныя інгрэдыенты.

Бульбу наразаем кавалачкамі і адпраўляем яе варыць разам з морквай (можна варыць бульбу і моркву ў лупінах). Бульбу варым да мяккасці (20—25 хвілін пасля закіпання) і размінаем да аднастайнасці, папярэдне зліўшы ўсю ваду. Пакідаем бульбяное пюрэ астываць да цёплага стану. Цыбулю і грыбы дробна наразаем, абсмажваем на алеі да гатоўнасці (да празрыстасці цыбулі і пакуль не выпарыцца вільгаць з грыбоў), дабаўляем дробна нарэзаную моркву і солім на смак.

Пакуль грыбы з цыбуляй, морква і бульба астываюць, гатуем заліўку: у асобнай ёмістасці змеш­ваем таматную пасту, соль і цукар (колькасць солі і цукру можна рэгуляваць на свой смак), праван­скія травы; заліваем кіпячонай вадой.

Замешваем бульбяное цеста: у цёплае пюрэ дабаўляем алей і муку. Муку ўсыпаем не ўсю адразу: яе можа спатрэбіцца менш, у залежнасці ад гатунку бульбы. Добра вымешваем. Бульбяное цеста не павінна рассыпацца. Стол высцілаем харчовай плёнкай, крыху змазанай алеем, і выкладваем бульбяное цеста ў выглядзе прамавугольніка.

На пласт бульбянога цеста выкладваем пласт грыбоў з цыбуляй і морквай. З дапамогай харчовай плёнкі заварочваем рулет.

Бульбяны рулет з грыбамі наразаем кавалачкамі і размяшчаем іх вертыкальна ў форме бочачкі, змазваем алеем.

Заліваем бульбяныя бочачкі згатаванай таматнай заліўкай.

Адпраўляем у духоўку, разагрэтую да 180°С, на 30—40 хвілін. Страву пасыпаем свежым кропам або іншай зелянінай і падаём на стол.

Рэцэпт ад Сяргея ХАРЭВІЧА.
Фота аўтара.