Боршч з арыгінальнай падачай

За час практычнай дзейнасці назапасіла нямала сакрэтаў, якімі дзялюся з навучэнцамі. У нашай справе немалую ролю адыгрывае фантазія, пачуццё густу, талент.

З аднаго боку, гатаванне страў патрабуе скрупулёзнасці, з другога — наяўнасці творчай жылкі, каб прыдумаць арыгінальны рэцэпт або вытанчанае ўпрыгажэнне стравы. Мусіць, у кожным з нас жыве гурман. Раздражніць апетыт можа не толькі прыемны водар, але і арыгінальнае афармленне стравы.

Прапаную рэцэпт баршчу, які натоліць вас сваім шармам, дробкай дабрыні і кропляй вытанчанасці.

“Сэрцам” любога баршчу з’яўляецца апетытны і наварысты булён, які я гатую на грыбным адвары і вэнджанай свініне.

У кіпячую ваду закідваю вэнджаныя свіныя рэбры ці іншую вэнджаніну, а таксама папярэдне замочаныя сушаныя белыя грыбы і вару 1,5—2 гадзіны. Пасля варкі мякаць з вэнджаніны і грыбы можна здрабніць і адправіць зноў у булён. Туды ж дадаю нарэзаную бульбу і пасля закіпання ўводжу папярэдне пасераваную з таматным пюрэ агародніну (нарэзаную саломкай цыбулю і моркву). Усё праварваю 20—25 мінут.

Важным момантам у гатаванні баршчу з’яўляецца яго колер, таму, каб яго захаваць, бурак — караля стравы — дадаю ў канцы гатавання, за 5—7 мінут да заканчэння, папярэдне адварыўшы і нарэзаўшы тонкай саломкай.

Разам з бураком дадаю соль, а для балансу смаку — цукар і воцат. Для прыемнага водару адпраўляю да ўсяго сала-шпік, расцёртае з часнаком, а затым абавязкова настойваю боршч 10—15 мінут.

На 4 порцыі спатрэбіцца:
буракі — 180 г;
вэнджаніна — 400 г;
грыбы сушаныя — 40 г;
шампіньёны — 20 г;
бульба — 200 г;
морква — 40 г;
цыбуля рэпчатая — 30 г;
таматнае пюрэ — 30 г;
алей — 10 г;
булён — 800 г;
соль — 10 г;
цукар — 10 г;
воцат — 5 г;
шпік — 80 г;
часнок — 20 г;
смятана — 60 г;
зеляніна пятрушкі — 6 г.

Лічу, што эфектная падача важная для любой стравы.

Падаю боршч у гаршчку з хлеба, зрэзаўшы з яго верх і выдаліўшы мякіш. У гэты арыгінальны посуд наліваю боршч, кладу астраўком смятану, слайсы грыбоў і крыху зеляніны.

У якасці афармлення і сервіроўкі выкарыстоўваю дошку з абпаленым пергаментам, на яго кладу сала і вэнджаніну, галоўку часнаку з зялёнай цыбуляй і пучком кропу.

Большую асалоду ўжыванню стравы надасць тэмпература падачы (не ніжэй за 75 градусаў).

Смачна есці!

Святлана ГОЛУБЕВА,
выкладчык вышэйшай катэгорыі Гомельскага дзяржаўнага прафесійна-тэхнічнага каледжа кулінарыі.