Пачынаем бегаць!

Здароўе з’яўляецца найвышэйшай каштоўнасцю і вызначае ўзровень жыцця чалавека. Адна з 17 Мэт устойлівага развіцця, прынятых і зацверджаных дзяржавамі — членамі ААН у 2015 годзе, гучыць так: “Забеспячэнне здаровага ладу жыцця і садзейнічанне дабрабыту для ўсіх у любым узросце”, што з’яўляецца своеасаблівым заклікам да дзеянняў кожнага з нас. “Што я магу зрабіць для гэтага сёння?” — спытаеце вы. Адказ відавочны. Можна пачаць з простага. Напрыклад, з джогінгу. Слова складанае, а справа карысная.

Джогінг — гэта лёгкі бег, бег трушком або бег з хуткасцю 7—9 км у гадзіну, што значна хутчэй за звычайную хадзьбу (4—6 км у гадзіну). Гэта а­дзін з бюджэтных і зручных відаў фізічнай нагрузкі і актыўнага адпачынку. Каб бегаць, неабходна толькі адпаведнае адзенне і абутак. Найлепшы час для бегу — раніца, бо раніцай арганізм выкарыстоўвае свае ўнутраныя рэзервы, у выніку чаго спальваюцца тлушчавыя клеткі. Найлепшае месца для бегу — лес, але, калі яго побач няма, можна бегаць па іншай прыдатнай для гэтага мясцовасці. Частая змена маршруту ўносіць разнастайнасць у прабежку, таму асвойвайце новыя дарожкі, не пазбягайце пагоркаў і спускаў (пераадоленне перашкод уключае ў работу розныя групы мышцаў). Заняткі варта пачынаць з размінкі, каб падрыхтаваць суставы і мышцы да нагрузкі, а заканчваць расцяжкай, якая верне мышцам неабходную форму. Рух пачынаюць з пяткі з наступным перакочваннем на ўсю ступню (як пры спартыўнай хадзьбе, але з больш энергічным адштурхваннем).

Пры адрыве адной нагі другая павінна знаходзіцца на зямлі (фаза палёту практычна адсутнічае). Бегавы крок павінен быць дробным: чым шырэйшы крок, тым большая нагрузка ідзе на суставы і звязкі. Спіну старайцеся трымаць прама, злёгку нахіляючы корпус наперад. Сагнутыя пад прамым вуглом рукі павінны рухацца рытмічна, плечы — быць расслабленыя. Калі тэмп бегу выбраны правільна, падчас прабежкі чалавек можа размаўляць не задыхаючыся, а сам працэс павінен прыносіць задавальненне.

Джогінгам можна займацца ў групе сяброў-аднадумцаў, у кампаніі чатырохногага сябра ці аднаму. Пасля правільна арганізаванай трэніроўкі прысутнічае невялікая стомленасць, але не знямога.

Заняткі бегам загартоўваюць, павышаюць супраціўляльнасць арганізма хваробам, трэніруюць сэрца і сасуды, суставы і сухажыллі, мышцы цела становяцца эластычнымі. Бег — выдатны сродак скінуць лішнія кілаграмы і стаць зграбным і вынослівым.

Тым, хто баіцца бегу ў класічным яго разуменні, варта падумаць пра джогінг, бо пры бегу трушком, у параўнанні са звычайным бегам, памяншаецца нагрузка на суставы ніжніх канечнасцей і зніжаецца рызыка траўміравання. Варта быць асцярожным тым, хто пакутуе на лёгачную недастатковасць, варыкознае расшырэнне вен, прагрэсуючую блізарукасць ці глаўкому, мае праблемы з сэрцам. Такой катэгорыі жадаючых выйсці на прабежку пачынаць трэніроўкі неабходна толькі пасля адабрэння ўрача.

З усталяваннем цёплага і камфортнага надвор’я прыходзіць час падтрымаць сваё здароўе і выйсці на прабежку для расслаблення і атрымання магутнага зараду пазітыўнай энергіі, дзеля ўласнага здароўя і ўнясення пасільнага ўкладу ў дасягненне Мэт устойлівага развіцця.

Дар’я ПАЛІКАРПАВА,
урач-эпідэміёлаг (загадчыца аддзялення СГМ і ацэнкі рызыкі) арганізацыйнага аддзела Мінскага абласнога цэнтра гігіены, эпідэміялогіі і грамадскага здароўя.