Пірог-торт “Вулкан”

Дэсерты — слабасць многіх з нас. Ну хто ўтрымаецца, каб не паласавацца порцыяй салодкага, ад якога чуецца гарачы пах пірага, у спалучэнні з кубачкам духмянай гарбаты?

Калі гаворка заходзіць пра выпечку да гарбаты, кулінарныя фантазіі і магчымасці становяцца проста бязмежнымі: вы можаце гатаваць на кефіры і на малацэ, з тварагу або без мукі, у мультыварцы ці духоўцы. І немалой папулярнасцю ў гаспадынь карыстаюцца рэцэпты спехам.

У гэтым цудоўным рэцэпце я прапаную спячы незвычайны, чароўны і вельмі смачны пірог-торт у выглядзе вулкана. Пад яго схіламі з порыстага шакаладнага бісквіту раскінулася цэлае возера далікатнага заварнога крэму. Зверху на яго сцякаюць патокі расплаўленай шакаладнай “лавы”, а арэхі “каменьчыкамі”раскіданы па паверхні “вулкана”.

Салодкі “Вулкан” атрымліваецца такім смачным, што вы палюбіце яго з першага кавалачка, такім пяшчотным, што літаральна растае ў роце, і такім эфектным, што дасць фору любому торту ці пірагу.

Гатаваць гэты пачастунак нескладана, выпякаецца ён разам з крэмам. Смела гатуйце пірог-торт “Вулкан” з заварным крэмам да любога святочнага стала — вашы госці высока ацэняць такі дэсерт!

Для пірага-торта “Вулкан” нам спатрэбіцца

Для заварнога крэму:

• 2 яйкі,

• 150 г цукру,

• 700 г малака,

• 70 г крухмалу,

• 1 пачак ванільнага цукру,

• 50 г сметанковага масла.

Для цеста:

• 320 г мукі,

• 150 г цукру,

• 4 яйкі,

• 250 г кефіру,

• 100 г алею,

• 3 ст. л. какавы,

• 20 г разрыхляльніка,

• растоплены шакалад для ўпрыгожвання,

• арэхі для ўпрыгожвання (могуць быць рознымі, іх колькасць — таксама).

Выпякаем у раздымнай форме памерам 22 см.

Для смятаннага крэму:

• 320 г смятаны,

• 1 пачак ванільнага цукру,

• 120 г цукру.

Гатаванне:

Пачнём з заварнога крэму. Змяшаем у каструлі альбо патэльні з тоўстым дном яйкі і цукар. Дададзім ванільны цукар і зноў змяшаем. Дададзім крухмал і, не перастаючы мяшаць, ульём малако. Паставім каструлю на агонь і давядзём сумесь да кіпення. Як толькі крэм першы раз булькне, знімем з агню, дададзім сметанковае масла, старанна перамяшаем да яго растварэння і накрыем крэм харчовай плёнкай.

Для гатавання бісквітнага цеста змяшаем у місцы венчыкам яйкі і цукар. Дададзім да іх кефір і алей, а затым — прасеяныя какаву і муку, разрыхляльнік. Замесім цеста, каб не засталося камячкоў.

Форму для выпякання засцелім пергаментнай паперай. Змажам яе рэшткамі алею. Перальём цеста ў форму, разраўняем яго паверхню лыжкай, затым выкладзем у цэнтр цеста крэм. (Гэта важна! У сярэдзіне цеста павінен атрымацца роўны круг з крэму.) Паставім форму ў духоўку, загадзя разагрэтую да 180 С°, на 40 мінут.

А пакуль можна гатаваць смятанны крэм. Для гэтага змяшаем смятану, цукар і ванільны цукар у місцы да аднароднасці.

З гатовага пірага-торта знімем форму, каб было зручней змазваць смятанным крэмам. Пальём гарачы пірог-торт смятанным крэмам, дадзім пастаяць, каб крэм увабраўся, і пальём яшчэ раз. Растопім у місцы шакалад і ўпрыгожым пірог-торт зверху шакаладнай “лавай”, пасыпем арэхамі.

Смачна есці!

Рэцэпт ад Сяргея ХАРЭВІЧА.
Фота аўтара.