“Анёл-ахоўнік”

Па статыстыцы, з пачатку гэтага года дзякуючы аўтаномным пажарным паведамляльнікам (АПП) выратаваны 71 чалавек, у тым ліку 15 дзяцей. Ці многа гэта ў маштабах рэспублікі? Скажу дакладна: многа, таму што ў некага дзякуючы АПП засталіся ў жывых блізкія сваякі, бацькі, пляменнікі, дзеці. Хтосьці змог у апошні момант выйсці з памяшкання, якое гарыць, і для іх гэты маленькі прыбор не проста “штуковіна, якая псуе інтэр’ер”, а своеасаблівы анёл-ахоўнік, які дапамог выратаваць жыццё.

У начы ў пасёлку Васток Рэчыцкака раёна Гомельскай вобласці ў адным з прыватных жылых дамоў адбыўся пажар. Двое дарослых і двое дзяцей змаглі самастойна пакінуць памяшканне, якое гарэла, пачуўшы гук АПП.

У пасёлку Сосны Любанскага раёна Мінскай вобласці сям’я з пяці чалавек дзякуючы АПП, які спрацаваў, змагла не толькі пакінуць дом, але і зрабіць захады па тушэнні пажару — да моманту прыбыцця ратавальнікаў загаранне было ліквідавана. Паводле папярэдніх даных, прычынай пажару стала парушэнне правіл эксплуатацыі электрасетак і электраабсталявання (пакінуты зараджацца на ноч ручны ліхтарык).

У Вялікай Альшанцы Чашніцкага раёна ў пачатку верасня сям’я з чатырох чалавек таксама выратавалася дзякуючы АПП. Пажар адбыўся ўначы, калі ўсе спалі. Пачуўшы гук АПП, людзі своечасова пакінулі памяшканне, якое гарэла. Паводле папярэдняй версіі, прычынай таго, што здарылася, стала пераграванне печы.

Факты гавораць самі за сябе, і людзей, якія зведалі на сабе, што такое пажар, не трэба ўгаворваць устанавіць паведамляльнік. Для іх АПП — гэта гарант іх спакою.

Прывяду яшчэ адзін прыклад. Гэтая гісторыя адбылася з маімі знаёмымі некалькі гадоў назад. Жылі яны тады ў прыватным доме. Аднаго разу сын Вася выйграў аўтаномны пажарны паведамляльнік і прынёс яго дадому. Бацькі пахвалілі дзіця, паклалі прыз на старую, няспраўную печ і паспяхова пра яго забылі. Але аднойчы Насця, сястра Васі, уключыла кіпяцільнік і пайшла на “хвілінку” да сяброўкі-суседкі пагаварыць. Вада выкіпела, кіпяцільнік загарэўся, і спрацаваў АПП. На прарэзлівы гук прыбеглі бацькі і суседзі, загаранне ліквідавалі свамі сіламі. Гісторыя скончылася добра, нават хамяк, які знаходзіўся ў “гушчы падзей”, гэта значыць непасрэдна ў клетцы каля кіпяцільніка, які загарэўся, не пацярпеў.

Пасля касметычнага рамонту ў доме маіх знаёмых АПП заняў сваё пачэснае месца на столі, і зноў недарма. Літаральна праз некалькі месяцаў у доме зноў адбыўся пажар. Што стала прычынай — перапад напружання ў сетцы або ўключэнне некалькіх прыбораў у адну разетку — засталося пытаннем, але гарэць пачало ўжо па-сапраўднаму. Уначы сям’я прачнулася ад гуку АПП, пакінула памяшканне, якое гарэла, і выклікала ратавальнікаў. Гісторыя сапраўды самая рэальная, і яе ўдзельнікаў цяпер дакладна не трэба пераконваць, што АПП патрэбная, а галоўнае, карысная рэч. У пацвярджэнне гэтага мае знаёмыя ўстанавілі АПП у кожным жылым пакоі новай добраўпарадкаванай кватэры.

Дзе і як правільна ўстанавіць АПП? Аптымальнае месца — у цэнтральнай частцы столі з невялікім зрушэннем у бок акна або дзвярэй, дзе адбываецца рух паветраных патокаў. Спрацоўваючы, паведамляльнік падае гучны сігнал, які пачуе нават чалавек, які спіць.

Як спыніць гучанне, калі АПП спрацаваў не ад пажару? Для гэтага неабходна праветрыць памяшканне або на працягу некалькіх секунд прапыласосіць паведамляльнік, не знімаючы яго са столі.

Ад чаго адбываюцца памылковыя спрацоўванні? Нярэдка гэта бывае з-за таго, што пара тлушчаў і іншых рэчываў, трапляючы ў адтуліны дымавой камеры, асядае на сценках пластмасавага корпуса і, высыхаючы, ператвараецца ў шчыльны налёт. Яшчэ адна прычына спрацоўванняў — пападанне ў камеру дыму з печы, з двара праз адчыненыя дзверы або ў выніку актыўнага курэння. Гэта гаворыць пра тое, што ваш паведамляльнік выдатна працуе і варта толькі ліквідаваць крыніцу дыму. І апошняя прычына — няспраўнасць паведамляльніка, але гэта сустракаецца вельмі рэдка.

Як часта трэба мяняць батарэйку? Замена элемента сілкавання праводзіцца адзін раз на год і не ўяўляе сабой нічога складанага. Паведамляльнік знімаецца са столі, дастаецца выкарыстаны элемент і ўстаўляецца новы. Адначасова трэба ачысціць дымавую камеру ад пылу з дапамогай пыласоса. Калі індыкатар, які знаходзіцца на корпусе паведамляльніка, пачаў пабліскваць, не ўтвараючы гукавога сігналу, значыць, АПП гатовы выконваць свае функцыі.

Іна ЧУГАЙ,
Рэспубліканскі цэнтр прапаганды МНС.