Дамашні торт “Пінчар”

Адзін з самых простых і даступных рэцэптаў бісквітнага торта — дэсерт “Пінчар”. Такі торцік можна прыгатаваць на любую ўрачыстасць, а таксама ў любы іншы дзень, каб парадаваць сваю сям’ю.

Гісторыя паходжання гэтага торта дагэтуль невядомая, але пагаворваюць, што сваю назву дэсерт атрымаў зусім не дзякуючы аднайменнай паро­дзе сабак. Пачастунак названы ў гонар вядомай англійскай сям’і кандытараў, члены якой былі майстрамі сваёй справы і славіліся сваімі кулінарнымі шэдэўрамі. Магчыма, рэцэпт гэтага дэсерту быў прыдуманы імі.

Торт “Пінчар” мае шмат назваў (у тым ліку і “Пінчар кучаравы”), але сутнасць ад гэтага не мяняецца. Акрамя таго, існуе некалькі спосабаў гатавання гэтай смакаты. Такі торт гатуюць з начынкай са згу­шчонкі, варэння, смятаннага крэму і наогул з усяго, што спалучаецца з далікатнымі каржамі. А яшчэ яго можна згатаваць з марожаным! Нечакана, праўда? Зрабіць торт “Пінчар” у хатніх умовах прасцей простага: вам трэба падрыхтаваць неабходныя інгрэдыенты і скарыстацца нашымі парадамі. Згата­ваць яго зможа нават кулінар-пачатковец. Бісквіт атрымліваецца мяккім і вільготным. Ён вельмі прыгожа выглядае ў разрэзе. Калі зрабіць гэты дэсерт правільна, ён атрымаецца такім жа цудоўным, як нам яго падаюць у рэстаране!

Нам спатрэбіцца:

• мука — 250 г;

• смятана 200 г;

• згушчонка — 180—190 г;

• цукар — 130 г;

• какава-парашок — 20 г;

• яйкі — 2 шт.;

• сода — 1 ч.л.;

• курага — 100 г;

• чарнасліў — 100 г;

• разынкі — 100 г.

Для крэму:

• смятана або вяршкі — 700 г;

• цукровая пудра— 200 г.

Для шакаладнай глазуры:

• цукар — 70 г;

• сметанковае масла — 50 г;

• малако — 50 г;

• какава-парашок — 20 г.

Кампаненты 1-га этапу: згушчонка, цукар, яйкі, смятана, сода, мука.

Бляшанку згушчанага малака пераліваем у асобную міску з высокім бортам. Туды ж дабаўляем цукар і яйкі. Дзяліць іх на бялкі і жаўткі не трэба. Пакідаем крыху згушчонкі — яна яшчэ спатрэбіцца. Потым уліваем у ёмістасць смятану, узбіваем усё міксерам. Неабходна, каб маса мела гушчыню крыху большую за сярэднюю.

Цяпер чарга мукі. Яе трэба папярэдне змяшаць з содай у асобнай талерцы. Муку прасеяць, каб цеста атрымалася “паветраным”. Тым, хто ўпершыню ўзяўся за торт, парада: саму муку трэба дабаўляць па частках — высыпаць за раз усе 250 г не варта. Каб “Пінчар” у хатніх умовах выйшаў на славу, усе інгрэдыенты добра змешваем.

2-гі этап

Бяром круглую форму і засцілаем яе дно пергаментнай паперай. Зачэрпваем 4—5 лыжак цеста і раўнамерна размазваем іх па ўсёй плошчы — гэта і будзе аснова для торта.

У гэты час трэба ўключыць духоўку на 180 °С. Калі яна прагрэецца, ставім форму хвілін на 10—15. Далёка не адыходзім, паглядаем на корж. Калі ён стаў даволі румяным, можна праверыць яго на гатоўнасць драўлянай зубачысткай. Калі нічога да яе не прыстала, значыць, усё добра. Корж астуджаем паступова. Адкрыўшы духоўку, даём ім настаяцца і толькі потым ставім на стол.

Кампанент 3-га этапу — какава-парашок.

У цеста, што засталося, прасейваем какаву-парашок. Пускаем у ход міксер. Калі сумесь атрымаецца густаватая — нічога страшнага.

Бяром бляху і засцілаем яе той жа паперай. Шакаладнае цеста трэба старацца заліць роўна, але без фанатызму. Усё роўна гатовы корж потым рэжацца на кавалачкі. Шакаладную аснову выпякаюць пры

180 °С 10—15 хвілін.

Кампанент 4-га этапу — згушчонка.

Гатовы круглы корж пераварочваем, яшчэ з гарачага здымаем паперу. Яго верх змазваем рэшткамі згушчонкі і пакідаем астываць.

Кампаненты 5-га этапу: разынкі, курага, чарнасліў.

Сухафрукты раскладваем па розных талерках і заліваем кіпенем. Даўшы ім настаяцца 10 хвілін, зліваем ваду і сушым папяровым ручніком. Чарнасліў і курагу трэба дробна парэзаць, прыкладна да памеру разынак.

Рэцэпт крэму

Наш “Пінчар” гатуем па рэцэпце са смятанай, таму яе спатрэбіцца нямала — бу­дзем рабіць крэм. У міску з халоднай смятанай засыпаем цукровую пудру і ўручную ўзбіваем да густой масы. Крэм наносім на ўжо халодны “кругляк”. Гатовыя квадрацікі змазваем ім жа і выкладваем на аснову, можа атрымацца крыху хаатычна, але гэта не крытычна для дадзенага дэсерту. Першы такі слой пасыпаем сухафруктамі. З другім “паверхам” робім тое ж самае і зверху накладваем трэці. Калі атрымаюцца няроўнасці верхняга слоя, памяняйце назву торта на “Кучаравы пінчар”. Цяпер атрыманую прыгажосць на гадзінку адпраўляем у халадзільнік, каб астыў і асеў крэм.

Рэцэпт глазуры

У маленькую каструльку кладзём цукар, малако і какаву. Добра змяшаўшы гэтыя інгрэдыенты, ставім на сярэдні агонь. Масу трэба памешваць, пакуль глазура не пачне гусцець. Звычайна ад пачатку закіпання патрабуецца 3 хвіліны. (Для глазуры можна ўзяць і шакалад, толькі варта ўлічваць, што 100-грамовая плітка — гэта эквівалент 50 г какавы і такой жа колькасці алею.)

У гарачую сумесь дабаўляем сметанковае масла і змешваем, каб яно цалкам растварылася. Даём астыць да крыху цёплага стану.

Фінальным акордам будзе работа з кандытарскім мяшком, з дапамогай якога на халодны торт наносіцца глазура. Нейкага строгага парадку няма — лініі наносяцца, як каму падабаецца.

Для насычэння адпраўляем нашу смакату ў халадзільнік на 7—8 гадзін. Там торт убярэ глазуру з крэмам.

І яшчэ адзін момант. Такія дэсерты часцей за ўсё ўпрыгожваюць арэхамі або ягадамі. Кавалачкі садавіны таксама падыходзяць для дэкору. У розных іншых “упрыгажэннях” няма ніякай патрэбы. Справа ў тым, што торт сам па сабе смачны і сытны. Але ў любым выпадку ўпрыгожванне дэсерту застанецца за вамі. Падаюць яго з гарбатай.

Смачна есці!

Рэцэпт ад Сяргея ХАРЭВІЧА.
Фота аўтара.