Духмяны кіш з агароднінай

Хачу падзяліцца рэцэптам, які восенню будзе вельмі актуальным. Кіш належыць да страў французскай кухні. Ён уяўляе сабой адкрыты пірог з асновай з цеста і заліўкай з яек, малака або вяршкоў і сыру. Кіш бывае з агародніннай, рыбнай або мясной начынкай. Гатуюць як вялікія кішы, так і маленькія парцыённыя.

У гэты рэцэпт увахо­дзяць вяршкі, цвёрды сыр, салодкі перац, шмат сметанковага масла (менавіта масла, а не спрэду!). Далікатнае пясочнае цеста ў спалучэнні з агароднінай, вяршкамі і сырам — гэта, бясспрэчна, вельмі смачна.

Інгрэдыенты:

250 г пшанічнай мукі першага або найвышэйшага гатунку; 5 яек; 125 г сметанковага масла (ахалоджанага); па адным салодкім балгарскім перцы чырвонага, жоўтага і зялёнага колераў; цвёрды сыр — 150 г; вяршкі — 200 мл; соль на смак; 1 пучок свежай зеляніны (кропу або пятрушкі); алей для змазвання формы для запякання (у мяне — вогнеўстойлівая шкляная).

Гатаванне

Муку прасеяць, дабавіць сметанковае масла, нарэзанае на кавалачкі, пасаліць і расцерці ў аднастайную крошку. Узбіць 1 яйка і ўліць ваду. Замясіць цеста, сфарма­ваць шар, загарнуць у харчовую плёнку і палажыць у халадзільнік на 30 мінут. Ахалоджваць пясочнае цеста вельмі важна, бо толькі ў такім выпадку яно набывае свой цудоўны характэрны смак.

Салодкі перац вымыць, ачысціць, нарэзаць дробнымі кубікамі. Зеляніну пакрышыць. Усю агародніну змяшаць у місцы, дабавіць нацёрты на буйной тарцы сыр.

Форму змазаць алеем або заслаць паперай для запякання, таксама змазанай алеем. Цеста злёгку раскачаць, выкласці ў форму, аформіць борцік. Вылажыць начынку.

Пасля гэтага 4 яйкі ўзбіць з вяршкамі. Раўнамерна заліць начынку кіша гэтай сумессю.

Не раю пры гатаванні гэтага пірага моцна захапляцца спецыямі накшталт чорнага перцу і іншых: салодкі балгарскі перац сам па сабе выдзяляе моцныя экстрактыўныя рэчывы, таму пірог становіцца вельмі духмяным.

Кіш трэба паставіць у папярэдне разагрэтую духоўку. Выпякаць на сярэдняй магутнасці 25—30 мінут.

Падаваць з малаком або вяршкамі.

Смачна есці!

Святлана СЁМІНА,
настаўніца англійскай мовы сярэдняй школы № 10 Брэста.
Фота аўтара.