Стол па-гродзенску

Гатаваць усёй сям’ёй — цудоўная традыцыя, якая заўсёды аб’ядноўвае дамачадцаў, напаўняе сумеснае правядзенне часу глыбокім сэнсам, цеплынёй і душэўнасцю. Стравы малой радзімы — гэта пах дзяцінства, гэта смак роднага дома, які грунтуецца на рэцэптах, што перадаюцца з пакалення ў пакаленне, на сямейных традыцыях. У кожнага народа ёсць свае любімыя стравы і свае, уласцівыя толькі яму, кулінарныя традыцыі.

Прапануем вам некаторыя рэцэпты. Спадзяёмся, яны вам спадабаюцца.

Бліны ад любімай бабулі

— 1 шкл. проса;

— 1 шкл. мукі;

— 3 шкл. малака;

— 2 яйкі;

— 30 г дражджэй;

— 2 ст.л. цукру;

— 3 ст.л. алею;

— каліва солі.

Для пачатку неабходна зварыць рассыпістую кашу з проса. Пакуль каша астывае, гатуем рошчыну з дражджэй, цёплай вады, сталовай лыжкі цукру і 1/2 шклянкі мукі.

У цёплую кашу дабаўляем 2 яйкі, сталовую лыжку цукру, муку, якая засталася, і частку цёплага малака. Усю масу ўзбіваем венчыкам да аднароднага стану, уліваем астатняе малако, рошчыну і пакідаем падыхо­дзіць.

У цеста дабаўляем 2-3 лыжкі алею і выпякаем бліны.

Хрусты з ільном

— 220—240 г мукі;

— 2 яйкі;

— 2-3 ст.л. малака;

— 0,5 ч.л. солі;

— 50 г семя льну;

— цукровая пудра;

— алей.

У адну міску ўсыпаем муку і соль, у другой місцы ўзбіваем яйкі з малаком. Яечную сумесь уліваем у муку і замешваем цеста. Яно павінна быць мяккім і эластычным. Раскачваем цеста таўшчынёй 1,5 мм, пасыпаем семем лёну, наразаем на квадраты 5х5 см, у сярэдзіне кожнага робім проразь тонкім нажом і праварочваем праз яе край цеста. Паўфабрыкат апускаем у разагрэты алей і смажым да залацістай скарыначкі. Гатовыя хрусты дастаём пры дапамозе шумоўкі на сурвэтку, для выдалення лішкаў алею. Зверху пасыпаем цукровай пудрай.

Пірог калядны

Для цеста:

— 1 яйка;

— 1 шкл. кефіру;

— 3/4 шкл. цукру;

— 10 г разрыхляльніка;

— 1,5 шкл. мукі.

Для заліўкі: 1 шклянка вяршкоў (10 ці 20%).

Для пасыпкі: 100 г какосавай стружкі, 3/4 шкл. цукру, 1 пакецік ванільнага цукру.

Навагодняя кампазіцыя з шакаладу.

У кефір убіваем яйка, размешваем, дабаўляем цукар, муку і разрыхляльнік, усё змешваем і выліваем у форму.

Для пасыпкі змешваем у сухім посудзе цукар з какосавай стружкай і ванільным цукрам. Гэтую сумесь раўнамерна размяркоўваем па ўсёй паверхні цеста. Ставім у нагрэтую духоўку і выпякаем пры тэмпературы 180—200°С каля 25—30 мінут (залежыць ад духоўкі). Сачыце, каб не падгарэла какосавая стружка (мінут праз 10 з пачатку выпякання можна прыкрыць пірог фольгай). Пасля выпякання гарачы пірог раўнамерна паліваем адной шклянкай вяршкоў.

Пірог маркоўны

— 500 г морквы;

— 360 г алею;

— 4 яйкі;

— 300 г мукі;

— 2 ч.л. соды;

— 460 г цукру;

— 1/2 ч.л. солі;

— 1 ст.л. карыцы;

— 200 г грэцкіх арэхаў.

Узбіваем міксерам алей з цукрам, потым дабаўляем яйкі, злучаем з надзёртай на дробнай тарцы морквай. Асобна змешваем сухія прадукты, усё злучаем, вымешваем да аднароднай масы. Форму высцілаем пергамент­най паперай і выліваем гатовае цеста. Выпякаем пры тэмпературы 180°С на працягу 30—40 мінут.

Гродзенскі дзяржаўны прафесійны тэхналагічны каледж актыўна ўдзельнічае ў конкурсах прафесійнага майстэрства. І ў нас нямала дасягненняў.

Напрыклад, залатыя медалі Ксеніі Патрэпка на Інтэрнацыянальным кубку 2019 у Мінску і Аляксея Курыльчыка на “Міжнародным чэмпіянаце кандытарскага майстэрства. Арт-клас” у намінацыі “Работа з шакаладу”, а таксама Ірыны Лукашун на “Міжнародным чэмпіянаце кандытарскага майстэрства. Арт-клас” у намінацыі “Мастацкая нарэзка агародніны і садавіны” і Аляксандры Васільчык у ІІІ Рэспубліканскім конкурсе прафесійнага майстэрства WorldSkills Belarus — 2018 у намінацыі “Кандытарскае майстэрства”.

Сярэбраны медаль Аляксандры Васільчык у Міжнародным конкурсе кандытараў у рамках Міжнароднай выставы ExpoSweet у Варшаве  (Рэспубліка Польшча) з работай з шакаладу “Прыгожае далёка”.

2-е месца Наталлі Ігнатовіч на Міжнародным чэмпіянаце кандытарскага майстэрства ў намінацыі “Мастацкая нарэзка агародніны і садавіны”.

2-е месца ў Рэспубліканскім конкурсе прома-ролікаў “Прафесія — новы фармат” (у рамках маладзёжнага праекта “WorldSkills — старт у будучыню!”) у намінацыі “Сацыяльныя і персанальныя паслугі” з работай “Дарога да поспеху”.

У Гродзенскім дзяржаўным прафесійным тэхналагічным каледжы вас гасцінна сустрэнуць афіцыянты, пачастуюць аперытывам бармены, парадуюць смачнай ежай кухары, згатуюць святочны дэсерт кандытары і складуць гэта ўсё ў найлепшую ўпакоўку прадаўцы.

З навучэнцамі, якія вучацца па прафесіі кухар і кандытар, праводзяцца заняткі ў рэсурсным цэнтры, дзе адпрацоўваецца гатаванне сучасных і традыцыйных страў на сучасным шматфункцыянальным абсталяванні. Заняткі праводзяцца таксама і для навучэнцаў іншых устаноў адукацыі Гродзенскай вобласці. У рэсурсным цэнтры ажыццяўляецца падрыхтоўка навучэнцаў да конкурсу прафесійнага майстэрства WorldSkills Belarus, падрыхтоўка рабочых па кваліфікацыі “кухар”, “кандытар” і праводзіцца павышэнне кваліфікацыі кухараў.

Клёцкі бульбяныя з крэмам з кіслай капусты

— 8—10 шт. бульбін;

— 1 яйка;

— 1 буйная цыбуліна;

— 1 морква;

— 100 г кіслай капусты;

— 1 ч.л. зярністай гарчыцы;

— 3-4 ст.л. мукі;

— соль;

— цукар;

— алей.

Абабраную бульбу варым, абсушваем, праціраем, ахалоджваем, дабаўляем яйкі, муку. З масы робім праснакі, на сярэдзіну ўкладваем крэм з кіслай капусты, краі зашчыпваем, фармуючы шарык.

Для крэму: кіслую капусту тушым з пасіраванай цыбуляй і морквай, зярністай гарчыцай каля 20—30 мінут. Гатовую капусту дробнім блэндарам.

Клёцкі абсмажваем і даводзім да гатоўнасці ў духоўцы.

Віншуем вас з надыходзячымі святамі і жадаем плёну ў працы.

 Алена ЧАЙКО,
загадчык рэсурснага цэнтра Гродзенскага дзяржаўнага прафесійнага тэхналагічнага каледжа