“Беларускі гармонік”

Яшчэ тры стагоддзі назад бульба на стале беларусаў была далікатэсам, а цяпер мы лічым яе другім хлебам. І выкарыстоўваць яе можна не толькі як гарнір. Звычайная бульба можа мець прывабны і багаты выгляд на вашым стале. Трэба адзначыць, што порцыя стравы, якую я вам прапаную зрабіць разам са мной, можа быць рознай, але калі вы хочаце, каб яна атрымалася такой, як на здымку, вам спатрэбіцца:

· дзве вялікія бульбіны (каб у выніку атрымалася не менш за 450—500 г);

· 200 г памідораў (па памеры яны мо­гуць быць розныя);

· 20 г сметанковага масла;

· 2 ст. лыжкі алею;

· соль і перац на смак.

Спатрэбіцца таксама харчовая фольга. Яе кавалкі павінны быць такімі, каб туды змяшчалася цалкам кожная бульбіна асобна.

Другі крок — гэта падрыхтоўка прадуктаў да гатавання. Кожную бульбіну трэба абабраць вельмі роўна (і добра, калі яна будзе крыху прадаўгаватай). Але ёсць і прыемны момант для тых, хто не любіць займацца маруднай працай: бульбу можна не абіраць, але тады пажадана, каб яна была маладой і з тонкай лупінай, а таксама вельмі роўнай і чыстай. Акуратна зрабіце на бульбе надрэзы (пад яе можна пакласці дзве кітайскія палачкі ці што-небудзь падобнае да іх; гэта неабходна для таго, каб выпадкова не разрэ­заць бульбіну цалкам). Разра­заць трэба не вельмі тоўста і не вельмі тонка, каб бульбіны добра прапякліся, але не разваліліся. Затым пакладзіце кожную бульбіну ў кавалак фольгі. Перад тым як закручваць, у кожную ячэйку змясціце тонка парэзаны памідор, пасыпце перцам, соллю і паліце алеем так, каб ён трапіў на ўвесь верх бульбіны, затым пакла­дзіце на яе кавалачак сметанковага масла. Шчыльна закруціце фольгу. Выкладзіце бульбу на бляху і пастаўце ў разагрэтую да 200°С духоўку прыблізна на 40 мінут. Пасля можаце раскрыць верхнюю частку фольгі і яшчэ на некалькі хвілін адправіць страву ў духоўку, каб падсмажыць верхнюю частку бульбы да залацістай скурачкі. Гатовую страву можна падаваць у фользе і без яе. 

А зараз пра галоўнае. Каб страва была паўнацэннай, я прапаную вам пакласці не бульбу да мяса, а мяса да бульбы. У нашым выпадку гэта будуць “Дамашнія катлеты”. Канечне, кожная гаспадыня гатуе іх па-свойму, але дазвольце прапанаваць вам свой рэцэпт. Каб упрыгожыць “Беларускі гармонік”, нам спатрэбіцца 2—4 катлеты, астатнія можна падаць як асобную страву.

Для катлет неабходна:

· 1кг дамашняга фаршу (ялавічына посная 0,5 кг і свініна 0,5 кг);

· белы хлеб (лепш тоставы, недзе 14—16 кавалкаў, або 0,5 адціснутага хлеба);

· адна вялікая цыбуліна;

· соль, чорны молаты перац на смак;

· вада;

· сухары паніровачныя;

· алей рафінаваны.

Хлеб трэба заліць вадой, зрэзаўшы з яго скарынкі. Тоставы хлеб вельмі порысты і адразу размокне. Дабаўце яго ў фарш. Хлеб мы кладзём не для эканоміі, а каб катлеты атрымаліся сакавітыя і мяккія. Для сакавітасці дадайце ў фарш і крыху вады. Фарш добра перамяшайце і адбіце, накрыйце яго харчовай плёнкай ці пергаментнай паперай, дайце адстояцца і астудзіцца, адправіўшы яго ў халадзільнік на 20—30 мінут.

Паніровачныя сухары высыпце на дошку і кожную порцыю фаршу ўкачайце ў сухарах, надайце форму катлеты. Бу­дзе добра, калі падрыхтаваныя да смажання катлеты яшчэ некалькі хвілін паля­жаць, тады яны стануц­ь шчыльнымі і бу­дуць лепш смажыцца. Сма­жыць варта на добра разагрэтай патэльні з немалой колькасцю алею.

Калі вы не маеце часу на гатаванне катлет, насмажце мяса альбо любога сала — гэтым вы таксама не сапсуяце страву “Беларускі гармонік”.

Калі ўсё будзе гатова, можаце заняцца ўпрыгажэннем стравы. Для гэтага спатрэбіцца:

· кроп, пятрушка, зялёная цыбуля;

· памідоры малога памеру (чэры альбо кактэйльныя);

· соусы (у маім выпадку маянэзна-часночны) на смак.

Побач з катлетамі ці мясам можна пакласці грыбы рознага гатунку. Таксама на стол можна паставіць салёныя агуркі ці кіслую капусту, але ўжо ў асобны посуд.

І нагадаю: такую страву з бульбы трэба падаваць на стол гарачай адразу з духоўкі.

Смачна есці!

Рэцэпт ад Сяргея ХАРЭВІЧА.
Фота аўтара.