Курыны рулет з капустай, яйкамі і сырам

Калі першы французскі кухар надаў лустачцы ялавічыны (магчыма, свініны або індычкі) форму мініяцюрнай цыгары, ён і не падазраваў, што стаў аўтарам новага кулінарнага шэдэўра. Сёння рулеты з мяса, фаршу сталі ўпрыгажэннем святочных сталоў, сытнай і смачнай штодзённай ежай. А колькі цудоўных начынак можна “схаваць” у кожным рулеце, згатаваўшы такім чынам сапраўдную страву-сюрпрыз!

Мясны рулет — гэта страва, здольная разнастаіць меню, парадаваць апетытным выглядам і выдатным смакам, таму гатаваць яе можна кожны раз па-новаму, мяняючы начынку зноў і зноў.

Сёння я прапаную вам рэцэпт курынага рулета з маладой капустай, яйкамі і сырам, а таксама бруснічным соусам, кунжутам, памідорамі чэры, пятрушкай і зялёнай салатай.

Чаму мне захацелася прапанаваць вам гэты рулет? Па-першае, таму што гатуецца ён вельмі лёгка і з простых прадуктаў; па-другое, зараз пара свежай капусты, якая надае мясу ў гэтай страве асаблівы смак; па-трэцяе, такая ежа вельмі карысная для нашага здароўя.

Курыны рулет з капустай, яйкам і сырам заўсёды атрымліваецца сакавітым і сытным. Яго можна падаць як на абед, так і на вячэру, а таксама ўпрыгожыць ім святочны стол. А яшчэ яго можна прадставіць як беларускую страву, бо ўсе прадукты для гатавання даступны нашай кухні.

Калі зрабіць усё як трэба, гэтым рулетам вы будзеце здзіўляць гасцей кожнае сваё застолле. А калі дабавіць новых прадуктаў, а таксама крыху фантазіі, то можна такую страву прапанаваць пад другой ­назвай.­ Акрамя таго, начынка для ­рулета можа быць рознай (бліны, амлет, ­грыбы, шпінат, морква, рыс, чарнасліў і г.д.).

Інгрэдыенты для курынага рулета з капустай, яйкамі і сырам:

капуста — 300 г;

яйкі — 5 шт.;

сыр — 70 г;

курыны фарш — 600 г;

цыбуля — 1/2 шт. (калі вы не ўжываеце цыбулю, яе можна не дадаваць);

чорны перац — 1/4 ч.л.;

соль — 2/3 ч.л.;

любімыя спецыі (запраўка);

бруснічны соус — 2 ст.л.

Для ўпрыгажэння стравы нам спатрэбяцца кунжут, памідоры чэры, пятрушка і зялёная салата.

Капусту дробна нашынкаваць. Яйкі крыху ўзбіць венчыкам. Дабавіць надзёрты на буйной тарцы сыр, соль, перац, капусту і ўсё перамяшаць.

Капусную масу размеркаваць па блясе (30—40 см), засцеленай пергаментнай паперай. Выпякаць у разагрэтай да 180°С духоўцы 15 мінут — корж павінен добра “схапіцца”. (Хачу звярнуць увагу на тое, што, калі капусная маса прыліпне да пергаментнай паперы, не трэба перажываць. Ёсць два спосабы выратаваць сітуацыю. Можна перавярнуць пергаментную паперу з выпечкай  і прыкласці на некалькі хвілін вільготны ручнік з боку паперы. Калі гэта не дапаможа, трэба проста акуратна зняць масу з паперы і змяшаць з фаршам — гэта зусім не сапсуе страву і захавае ваш настрой.)

У мясны фарш (у мяне — з курыных грудак) з цыбуляй дабавіць любімую запраўку (я бяру “Універсальную з натуральнай сушанай агароднінай”), соль, перац і перамяшаць. Фарш раўнамерна размеркаваць па паверхні капуснага каржа. Скруціць шчыльны рулет. Загарнуць яго ў фольгу і выкласці на бляху швом уніз. Запякаць пры 180°С 35—40 мінут.

Пасля гэтага пры дапамозе звычайных кухонных нажніц разрэзаць фольгу пасярэдзіне, развесці яе канцы ў розныя бакі, змазаць рулет бруснічным соусам і ўзбітымі яйкамі, пасыпаць кунжутам і пакінуць страву ў духавой шафе яшчэ на 10 мінут альбо пакуль не падрумяніцца. 

Рулет добра рэжацца, атрымліваецца вельмі духмяным, сытным, сакавітым і незвычайна смачным!

Рэцэпт ад Сяргея ХАРЭВІЧА.
Фота аўтара.