Магічныя стравы Новага года

Пярэдадзень ­Новага го­да — асаблівы, чароўны час для кожнага з нас. Мы жывём чаканнем цуду, выбіраем падарункі родным і блізкім і стараемся запоўніць апошнія дні старога года прадчуваннем новых перамог і дасягненняў.

Хтосьці падымаецца на горныя вяршыні, хтосьці апускаецца пад зямлю ў таямнічыя, нязведаныя пячоры, некаторыя арандуюць начныя клубы ці рэстараны, але даволі вялікая колькасць людзей пры­трымліваецца старой традыцыі і сустракае Новы год у сваім мілым сэрцу доме, у коле родных і блізкіх людзей.

Пры гэтым, дзе б вы ні былі, самае галоўнае пытанне будзе гучаць так: “Што ж мы будзем есці ў навагоднюю ноч?”

Сёння я пастараюся як мага падрабязней расказаць аб стравах, якія прынясуць вам удачу і дабрабыт у новым го­дзе.

Напачатку нагадаю, што магічная расліна любога Новага года — бабовыя. Лічыцца, што менавіта яны прынясуць у будучыні фінансавы дабрабыт і стабільнасць. Ці трэба абавязкова ўключаць стравы з бабовых у навагодняе меню? Не. Спецыялісты па фэн-шуй, ізатэрыкі і жыхары Паўднёвай Амерыкі ўпэўнены, што такія стравы трэба гатаваць у першыя суткі новага года. Бабовыя можна выкарыстоўваць як гарніры і дадаваць у салаты, гатаваць з іх асобныя стравы — усё залежыць ад вашых кулінарна-гастранамічных прыхільнасцей.

Таксама магічная страва Новага года — пельмені. Згодна з усходнімі традыцыямі, пельмені прынята есці пасля поўначы, як сімвал адзінства ўсіх членаў сям’і. Асноўная ідэя гэтага звычаю ў тым, што ўсе і ўсё сканцэнтроўваецца ў адным месцы: сям’я за сталом, пельмені на стале. Слова “пельмені” (цзяацзы) гучыць па-кітайску гэтак жа, як і выраз “змена знакаў, пераход у новае”. Маецца на ўвазе, што ноччу адбываецца сустрэча мінулага і будучыні, двух знакаў — сімвалаў будучага года і года адыходзячага. У нашым выпадку на змену Пеўню прыйдзе Жоўты Земляны Сабака.

У завяршэнні аповеду аб гастранамічнай магіі мне застаецца толькі дадаць, што магічны смак года Сабакі горкі, таму не забудзьцеся паставіць на святочны стол гарчыцу, хрэн ці васабі.

Акрамя таго, удачу ў надыходзячым годзе вам прынясе пара глыткоў звычайнай пітной вады, якія абавязкова трэба зрабіць за святочным сталом.

Напіткі навагодняй ночы — любыя. Але пад звон курантаў пажадана падняць бакалы з традыцыйным шампанскім. Не забудзьцеся за сталом прамовіць тост за сяброўства і адданасць і будзьце верныя сваім словам увесь год.

І памятайце: Сабака не любіць сядзець галодным. Разнастайныя мясныя закускі: каўбасы, вяндліна, шынка, бужаніна, галанцір, халадзец, заліўныя языкі, вэнджаніна, паштэты — чым больш, тым лепш. Сабака гэтак жа ацэніць і яркасць стала: як мінімум некалькі розных па колеры фруктаў і агародніны павінны ўпрыгожваць стол, хаця сімвал надыходзячага года і не аматар расліннай ежы.

Апошнія некалькі гадоў на старонках маёй калонкі мы гатавалі розныя навагоднія стравы: розных краін, па знаках задыяка і ў залежнасці ад майго геаграфічнага становішча. Сёння я хачу вам прапанаваць хуткае і не вельмі працаёмкае меню святочнага стала.

Некалькі слоў пра цікавыя спалучэнні прадуктаў у салаце

  1. 400 г буракоў, 200 г любога плаўленага сыру, 7—8 марынаваных агуркоў сярэдняга памеру, маянэз, соль і чорны перац на смак. Надзерці на буйной тарцы вараныя буракі і плаўлены сыр, парэзаць маленькімі кубікамі марынаваныя агуркі, пасаліць, заправіць маянэзам, добра перамяшаць, даць пастаяць га­дзінку ў халадзільніку. Можна дадаць цыбулю, але неабавязкова. Спалучэнне нетрадыцыйнае, але вельмі ўдалае.
  2. Адзін чырвоны вялікі балгарскі перац, адзін кісла-салодкі яблык, ­адзін вялікі памідор. Парэзаць іх на кавалачкі. Сярэдні чаранок сельдэрэю па­дзерці на тарцы. На тарцы падзерці і невялікі кавалак цвёрдага сыру, лепш за ўсё з вастрынкай. Адзін зубок часнаку таксама падзерці. Усё змя­шаць. Дабавіць сумесь ­праванскіх траў, некалькі кропель аліўкавага алею, крышку карыцы і маянэзу. Соль не класці, бо і ў праванскіх травах і ў маянэзе яна ўжо ёсць.
  3. Два апельсіны, адна сярэдняя цыбуліна, бляшанка зялёных алівак без костачак (можна з начынкай — міндаль, лімон, мандарыны), соль, перац, алей. Апельсіны пачысціць, раздзяліць на долькі, кожную дольку парэзаць на кавалачкі. Цыбулю абабраць, парэзаць тонкімі паўкольцамі, апарыць кіпнем, потым заліць халоднай вадой. Аліўкі дастаць з расолу і парэзаць на 3—4 част­кі. Змяшаць парэзаныя апельсіны, адціснутую цыбулю, аліўкі. Заправіць алеем, пасаліць і дадаць чорны перац. З чырвонай цыбуляй яшчэ смачней.

Карп у белым віне

Нам трэба:

карп — 2 кг (2 тушкі);

сухое белае віно — 500 г;

часнок — 6—8 зубкоў;

алей — 3 ст.л.;

молаты чорны перац на смак;

соль.

У працэсе:

Цэлую апрацаваную рыбу пасаліць знутры і звонку, пакінуць на 1,5 гадзіны. Потым пашаткаваным часнаком напоўніць брушка, зашыць. Змазаць рыбу алеем, паперчыць і пакласці ў змазаны сметанковым маслам шырокі сатэйнік. Заліць віном і гатаваць пад накрыўкай. Падчас гатавання паліваць рыбу віном. Гатовая рыба лёгка пратыкаецца відэльцам.

Птушка па-амерыканску

Нам трэба:

птушыная тушка (індычка, ногі індычкі ці цэлая курыца);

2 ст.л. сметанковага масла;

1 ст.л. мёду;

2 ст.л. сталовага віна (белага ці чырвонага);

2 ст.л. солі;

чорны і чырвоны перац па 1 ч.л.;

кары, імбір, молаты кроп па 1 ч.л.

У працэсе:

Птушку памыць, абсушыць, скуру ў некалькіх месцах удоўж надрэ­заць. Масла распусціць і ўзбіць відэльцам з астатнімі інгрэдыентамі. Птушку нацерці і пакінуць марынавацца на 2—6 гадзін, час ад часу зноў націраючы звонку і знутры. Паставіць у добра прагрэтую духоўку і запякаць 1,5—2 гадзіны пры тэмпературы 160°С першую гадзіну і 180°С другую. Перыядычна паліваць соусам, які будзе ўтварацца.

І дэсерт:

Зімовае пячэнне

Нам трэба:

мука — 2,5 шклян­кі;

парашок пякар­-
скі — 1 ч.л.;

арэх мускатны молаты — 0,5 ч.л.;

карыца — 0,5 ч.л.;

соль — 0,5 ч.л.;

масла сметанковае — 150 г;

цукар — 1 шклянка;

шматкі аўсяныя — 1 шклянка;

журавіны сушаныя — 1 шклянка;

разынкі залацістыя — 1 шклянка;

арэхі грэцкія — 1 шклянка;

яйка — 1 шт.;

мёд — 2 ст.л.;

ёгурт натуральны — 0,5 шклянкі;

імбір надзёрты — 1 ст.л.;

лімон (цэдра) — 1 ст.л.

У працэсе:

Высцеліце паперай для выпечкі дзве бляхі. Пасячыце арэхі. Змяшайце муку, пякарскі парашок, карыцу, мускатны арэх і соль. Перамяшайце размякчанае сметанковае масла з цукрам. Дадайце яйка, мёд, ёгурт, імбір і цэдру, узбіце да аднароднага стану. Увядзіце мучную сумесь, замясіце цеста. У канцы ўсыпце аўсяныя шматкі, арэхі, разынкі, журавіны, перамяшайце. Выкла­дзіце цеста чайнай лыжкай на бляхі ў выглядзе круглага пячэння. Разагрэйце духоўку да 200°С. Выпякайце кожную порцыю па 15 хвілін да залацістага колеру, дайце астыць на рашотцы.

ПАРАДА: цеста атрымліваецца вязкае, кансістэнцыі густой неаднароднай смятаны. Выкладваючы яго на бляху лыжкай, змочвайце яе ў шклянцы халоднай вады і пакідайце адлегласць паміж пячэннем. Падчас выпякання цеста крыху расплываецца.

Самы просты ў свеце кекс

Нам трэба:

пшанічная мука — 250 г;

цукровы пясок — 250 г;

маргарын — 250 г;

яйкі — 4 шт.;

сметанковы лікёр — 125 мл;

шакаладная крошка — 50 г;

ванільны цукар — 10 г;

разрыхляльнік цеста — 10 г.

У працэсе:

Узбіць яйкі з цукрам, пакуль маса не стане белага колеру. Дабавіць размякчаны маргарын і ўзбіваць яшчэ 2 хвіліны. Муку прасеяць, змяшаць з разрыхляльнікам і ванільным цукрам, дабавіць у яечна-масленую сумесь і старанна перамя­шаць. Дадаць лікёр і шакаладную крошку. Перамя­шаць, але не ўзбіваць, інакш шакалад растворыцца. Выліць масу ў змазаную маргарынам форму і выпякаць у папярэдне разагрэтай да 170°С духоўцы 40—60 хвілін.

Як варыянт для рашучых кулінараў:

Птушка глясэ

Нам трэба:

500 г філе індычкі ці курыцы;

шклянка моцнай зваранай кавы;

50 г мёду;

200 г 20% вяршкоў;

соль на смак, прыблізна 1—2 ч.л.;

молаты чорны ці белы перац на смак.

У працэсе:

Мяса нарэзаць на кавалачкі і абсмажыць на алеі. Дадаць каву і патушыць 10 хвілін. Далей дабавіць мёд і вяршкі, соль, перац. Тушыць да мяккасці.

“Аліўе” лёгкі

Бульба вараная — 300 г.

Вараныя курыныя грудкі — 400 г.

Вараная каляровая капуста — 200 г.

Агуркі салёныя і марынаваныя — па 150 г.

Зялёны гарошак — 200 г.

Вараная морква — 100 г.

Цыбуля рэпчатая — адна невялікая галоўка (дробна шаткуем).

Заправа: сумесь 15%-й смятаны і любога лёгкага маянэзу + чайнай лыжкі лімоннага соку. Соль і чорны перац на смак.

Усе кампаненты салату дробна парэзаць і змяшаць. Калі вы заменіце курыцу цяляцінай, атрымаецца яшчэ смачней, але больш каларыйна.

Бульба запечаная

Буйныя бульбіны вымыць шчоткай, пасаліць, шчыльна загарнуць у фольгу разам з зубком часнаку і невялікім кавалачкам сметанковага масла. Пада­ваць бульбу ў фользе, надрэзаўшы крыж-накрыж.

З надыходзячым Новым годам! Кахання, здароўя і кулінарнага натхнення вам і вашым блізкім!

Таша ЛАПАЦЕНКА,
гастранамічны аглядальнік, партнёр і дарадца
Гільдыі шэф-кухараў Беларусі, член Асацыяцыі
рэстаранна-гастранамічных аглядальнікаў Расіі.