Салата “Музычная восень”

Дарагія чытачы, вітаю вас на кулінарнай старонцы гэтага выдатнага, любімага мной выдання і хачу звярнуць увагу на тое, што каляндарны час і нашы рэцэпты летняга перыяду ўжо перамясціліся ў яркую, багатую пару года — восень, якая кожны сезон дорыць нам багацце садавіны і агародніны. 

Восень асабліва багатая на духмяныя яблыкі і грушы, сакавітыя караняплоды і, вядома, лясныя грыбы. У гэты час знаходлівыя гаспадыні спрытна робяць запасы на зіму ў выглядзе кансервацыі, замарозкі і сушкі многіх прадуктаў. А каб разнастаіць ваш восеньскі рацыён, хачу прапанаваць вам такі ж яркі, як гэтая пара года, рэцэпт салаты з каляровай фасолі!

Салата “Музычная восень” быццам адмыслова створана да пачатку восеньскіх пасядзелак і пікнікоў. Яна напоўнена карыснай агароднінай, кантраснымі тэкстурамі і цэлай гамай смакаў з салодкімі і аскомістымі ноткамі. Частка інгрэдыентаў выграваецца на патэльні, а частка агародніны дабаўляецца свежай. Усе разам яны гарманічна дапаўняюць і адзін аднаго, і зорку гэтага рэцэпта, так званую кульмінацыю восеньскай сімфоніі — каляровую фасолю.

Гэты рэцэпт я калісьці знайшоў у старым часопісе, таму некаторыя моманты прыйшлося адаптаваць да сучаснага спажывецкага кошыка, але мерныя ёмістасці, якія прапанаваны ў рэцэпце, я не мяняў. Дам толькі невялікае ўдакладненне.

У рэцэпце выкарыстоўваюцца мерныя ёмістасці аб’ёмам:

1 шклянка (шк.) — 240 мл,

3/4 шклянкі (шк.) — 180 мл,

1/2 шклянкі (шк.) — 120 мл,

1/3 шклянкі (шк.) — 80 мл,

1/4 шклянкі (шк.) — 60 мл,

1 сталовая лыжка (ст.л.) — 15 мл,

1 чайная лыжка (ч.л.) — 5 мл. 

Нам спатрэбіцца:

Свежае кукурузнае зерне — 1 шк. (прыкладна з 2 пачаткаў);

Салодкі перац аранжавы — 1 шт.;

Палова невялікай чырвонай цыбуліны, нарэзанай кубікамі;

аліўкавы алей extra-virgin — 1 ст.л.;

кансерваваная каляровая фасоля — 1 бляшанка (425 г);

памідоры чэры — 1 шк. (можна дабавіць некалькі жоўтых кактэйльных памідораў), разрэзаць іх напалову;

авакада — 1 невялікае, разрэзаць напалову і нарэзаць кубікамі;

каляндра сечаная свежая — 1/4 шк., можна замяніць пятрушкай.

Для запраўкі:

часнок — 1 невялікі зубчык;

сок лайма — 3 ст.л.;

буйназярністая соль — 2 ч.л.;

парашок чылі — 1/4 ч.л.;

аліўкавы алей extra-virgin — 1/4 шк.;

гарбузовыя семкі — 1 ст.л.

Перш чым распачаць гатаванне нашай салаты, звярну вашу ўвагу на тое, што фасолю неабавязкова браць кансерваваную, можна і свежую. Проста некаторыя гаспадыні лічаць працэс гатавання фасолі даволі клопатным. Для іх я хачу прапанаваць спосаб адварвання фасолі, пра які прачытаў калісьці ў адной разумнай кнізе і з таго часу нязменна ім карыстаюся. У гэтым выпадку фактычны час варкі фасолі складае не больш за 10 хвілін! Праўда, патрабуецца час для замочвання, але фасоля, згатаваная такім спосабам, добра захоўвае сваю форму, не рассыпаецца. Аднак пра ўсё па парадку.

Заліваем фасолю халоднай вадой і пакідаем на ноч, а яшчэ лепш на суткі. За гэты час ваду трэба некалькі разоў змяніць на новую. Фасоля набракне і павялічыцца ў аб’ёме ўдвая. Затым ваду зліваем, выкладваем фасолю ў каструлю і заліваем свежай халоднай вадой. Не солім! Даводзім да кіпення, варым 3—5 мінут, выключаем газ і пакідаем фасолю прыкладна на гадзіну. Яшчэ раз паўтараем працэдуру, але цяпер даём фасолі настаяцца мінут 30. Звычайна гэтага бывае дастаткова — фасоля гатовая. Калі ж фасоля была вельмі сухая або трапіўся цвярдзейшы гатунак, паўтараем апісаныя дзеянні трэці раз. З гатовай адваранай фасолі зліваем ваду. Такую фасолю можна дабаўляць не толькі ў салату, але ў першыя і ў другія стравы. Дарэчы, можна адварыць адразу вялікую колькасць фасолі, раскласці па пакетах і замарозіць.

Ну а цяпер, калі ўсе інгрэдыенты на месцы, пачынаем.

Згатуйце запраўку: расцісніце зубчык часнаку, пасаліце і разамніце тупым бокам вялікага нажа да атрымання грубай пасты. Змяшайце ў місцы часночную пасту, сок лайма, соль і парашок чылі. Паступова ўмяшайце аліўкавы алей, пачынаючы з некалькіх кропель. 

Абсмажце кукурузу, салодкі перац і цыбулю на патэльні на ўмераным агні, пакуль яны не пачнуць скварчэць. Дабаўце каляровую фасолю і гатуйце, пакуль яна не прагрэецца. Уліце запраўку і старанна перамяшайце. Пасаліце і паперчыце на смак. Зніміце з агню і акуратна ўмяшайце памідоры, авакада і каляндру (пятрушку). Выкладзіце салату на талерку, пасыпце яе гарбузовымі семкамі. Падавайце да стала, папярэдне астудзіўшы. За гэты час вы заўважыце, што смакавая гама інгрэдыентаў салаты раскрыецца ва ўсёй сваёй паўнаце. 

Смачна есці!

Рэцэпт ад Сяргея ХАРЭВІЧА.
Фота аўтара.