Смачны нескладаны салат — выдатны спосаб перакусіць

І смак, і знешні выгляд салата залежаць не толькі ад якасці выкарыстаных прадуктаў, але і ад таго, як яны былі падрыхтаваны і згатаваны. Існуюць нескладаныя, але важныя агульныя правілы гатавання салатаў, каб максімальна выкарыстаць смакавыя магчымасці ўсіх інгрэдыентаў, а таксама захаваць карысныя ўласцівасці прадуктаў.

Падрыхтоўка прадуктаў:

усе салаты са свежай агародніны трэба гатаваць непасрэдна перад падачай на стол;

варыць агародніну для салата неабходна ў невялікай колькасці вады. Такім чынам захаваюцца больш карысных рэчываў і смак;

перад гатаваннем рэкамендуецца астудзіць усе прадукты;

бульбу, моркву і буракі для салата трэба варыць толькі ў лупінах і захоўваць неабабранымі. Чысціць і рэзаць звараную агародніну неабходна непасрэдна перад гатаваннем салата;

катэгарычна нельга змешваць цёплыя і халодныя інгрэдыенты.

Запраўка:

салаты запраўляюць смятанай, маянэзам або алеем, у які можна дабавіць воцат, перац, соль і цукар. Можна зрабіць дамашні маянэз ці замяніць яго ёгуртам, смятанай, аліўкавым або кунжутным алеем. А калі сюды дабавіць яшчэ гарчыцу, сок лімона або часнок, то смакавыя спалучэнні зайграюць незвычайнымі фарбамі. Дарэчы, нават мяса, птушка і рыба з такой запраўкай “гучаць” нашмат цікавей!

у запраўку можна дабавіць аджыку, гарчыцу, таматны соус;

запраўляць салат трэба непасрэдна перад падачай на стол. Выключэнне складаюць слаёныя салаты, якім па рэцэпце трэба “настаяцца”;

паколькі дрэнная запраўка можа сапсаваць нават самы выдатны салат, асаблівую ўвагу ўдзяляйце якасці маянэзу і смятаны;

падаваць салаты можна не толькі ў салатніках. Іх можна парцыённа сервіраваць у тарталетках, на лістах зялёнай салаты, кавалках хлеба, лустачках вяндліны або каўбасы, а таксама ў выглядзе начынкі ў свежай, смажанай або тушанай агародніне.

Хітрыкі ад Анатольеўны:

выкарыстоўвайце кансервы. Не прыйдзецца думаць, як згатаваць тунца, сёмгу або кальмараў — яны адразу могуць адпраўляцца ў талерку;

для бабовых гэта таксама вельмі актуальна. Прафесіяналы запэўніваюць, што гэта самы просты спосаб за пару хвілін зрабіць смачны салат;

дабаўляйце вэнджанае мяса, каўбасы, сасіскі — іх не трэба гатаваць;

старайцеся падбіраць кампаненты так, каб яны не патрабавалі тэрмаапрацоўкі, а страве не трэба было настойвацца;

не забывайце пра акцэнты! Абсмажаныя арэшкі, сухарыкі, несалодкія ягады — прадукты, якія пойдуць на карысць нават самай простай кампазіцыі.

Cалат з тунцом

Агурок, памідор і два вараныя яйкі наразаю кубікамі. Салатнае лісце прамываю і абсушваю. Адкрываю бляшанку тунца і размінаю яе змесціва відэльцам. Для заліўкі змешваю дзве лыжкі аліўкавага алею, чайную лыжку дыжонскай гарчыцы, соль і лімонны сок на смак.

Дадзены салат варта гатаваць і падаваць на стол парцыённа. Таму на кожнай талерцы раскладваю салатнае лісце, на яго выкладваю агуркі, а вакол кольцамі памідоры. Паліваю агародніну заліўкай. Пасыпаю агуркі здробленым тунцом і яйкамі і затым падаю страву на стол.

Салат з каўбасой

Ачышчаю, наразаю паўкольцамі і абсмажваю на патэльні адну белую цыбуліну. Узбіваю відэльцам чатыры курыныя яйкі, затым уліваю іх у патэльню да цыбулі. Абсмажваю атрыманы блін з двух бакоў. Калі ён астыне, наразаю яго тонкімі палоскамі. 250 г вяндліны або варанай каўбасы рэжу доўгімі брусочкамі. Кансерваваныя шампіньёны (адну бляшанку) рэжу саломкай. У вялікай салатніцы злучаю падрыхтаваныя інгрэдыенты, запраўляю іх соллю, здробленым часнаком, сечанай зелянінай і маянэзам. Салат змешваю і адпраўляю ў халадзільнік на паўгадзіны, каб усе інгрэдыенты “пасябравалі” паміж сабой.

Незвычайна лёгкі, хуткі і вельмі смачны рэцэпт слаёнага салата з сёмгі з грэйпфрутам.

Нам спатрэбіцца: слабасалёная сёмга — 150 г; грэйпфрут — 1 шт.; яйкі — 3 шт.; сыр цвёрды — 100 г; аліўкавы алей — 40 мл.

Як чысціцца грэйпфрут? Нажом акуратна здымаю скуру разам з усёй белай плёнкай, таксама выдаляю мембранныя перагародкі, бо яны даюць непрыемную горыч.

Сок зліваю ў асобны посуд і буду выкарыстоўваць яго для запраўкі. Наразаю мякаць невялікімі кавалачкамі. Сёмгу рэжу сярэднімі кубікамі.

Адвараныя ўкрутую яйкі націраю на дробнай тарцы. Цвёрды сыр — на буйной тарцы.

Для салатнай запраўкі змешваю сок грэйпфрута і аліўкавы алей.

Выкладваю салат слаямі: першы слой — грэйпфрут, другі — сыр, потым сёмга і зверху яйкі. Паліваю запраўкай. Для ўпрыгожвання можна выкарыстоўваць любую зеляніну.

З павагай і любоўю, Анатольеўна.

Наталля ЮШКЕВІЧ.
Фота аўтара.