Заліўны пірог з агароднінай, яйкам і вяндлінай на кефіры

Для любога чалавека, добра знаёмага з кулінарыяй і не вельмі, заліўныя пірагі — гэта проста знаходка. Гатуецца гэтая сытная, смачная, прыгожая страва даволі хутка і проста. Паверце, яна зможа стаць сапраўднай палачкай-выручалачкай у непрадбачаных сітуацыях. Хачу сказаць пра тое, што мае самыя першыя пірагі былі менавіта заліўныя, таму што яны — бяспройгрышны варыянт для пачаткоўца кулінара.

Калі вы будзеце строга прытрымлівацца рэ­цэпта, не мяняючы прадукты, іх вагу і час прыгатавання, у вас усё атрымаецца з першага разу і вы зможаце парадаваць не толькі сябе, але і ўсіх, каму прапануеце гэты заліўны шэдэўр. Ну а калі ваша кулінарнае майстэрства, па вашым меркаванні, будзе ўжо высокім, тады зможаце гэты рэцэпт адаптаваць да любых іншых прадуктаў  і начыняць цеста грыбамі, морапрадуктамі ці дзічынай у розных варыянтах.

Інгрэдыенты

Для цеста:

300 г мукі,
300 г кефіру,
200 г смятаны,
4 яйкі і 1 бялок,
0,5 ч.л. солі,
20 г разрыхляльніка.
Для начынкі:
100 г струковай фасолі,
100 г брусельскай 100 г морквы,
50 г зялёнай цыбулі,
150 г вяндліны (любой варанай каўбасы),
4—6 адвараных яек,
зеляніна,
1 ст.л. смятаны (алею),
соль, перац.

Для змазвання:

1 жаўток,
1 ст.л. смятаны,
1 ст.л. кунжуту.

Для формы:

1 ст.л. алею,
паніровачныя сухары.

Спачатку гатуем начынку для пірага. Дробна рэжам зялёную цыбулю, туды ж наразаем свежую зеляніну: у мяне — кроп і зусім крыху пятрушкі. Папярэдне адвараныя яйкі чысцім і здрабняем. Зрабіць гэта можна рознымі спосабамі: пацерці на буйной тарцы або, як у маім выпадку, нарэзаць дробнымі кубікамі.

Адпраўляем нарэзаныя яйкі ў міску з зелянінай, туды ж дабаўляем адвараную агародніну (моркву, струковую фасолю, брусельскую капусту) і вяндліну (усё павінна быць нарэзана дробнымі кубікамі). Дабаўляем соль і перац на смак, а таксама адну сталовую лыжку смятаны, распушчанага сметанковага масла або алею. Начынку добра змешваем і адстаўляем убок.

А цяпер зоймемся цестам — гатуецца яно вельмі лёгка і хутка.

У міску, у якой будзем яго замешваць, убіваем 4 яйкі і 1 бялок, а жаўток разам з лыжкай смятаны пакінем для змазвання пірага.

Высыпаем соль, дабаўляем смятану і выліваем кефір. Усё добра змешваем.

Асобна ў міску з прасеянай мукой дабаўляем разрыхляльнік, добра змешваем сухую сумесь і ў некалькі прыёмаў высыпаем у міску, замешваючы цеста.

Старайцеся змяшаць масу да аднастайнасці, каб не засталося камячкоў.

Цеста, якое ў вас атрымаецца, павінна быць даволі вадкім, па кансістэнцыі нагадваць цеста для бліноў.

Начынка і цеста цалкам гатовыя. Цяпер зоймемся формай.

Я буду выкарыстоўваць шкляную форму памерам 27х27 см.

Змазваем яе любым алеем і прысыпаем паніровачнымі сухарамі або засцілаем пергаментнай паперай.

У падрыхтаваную такім чынам форму выліваем палову цеста і на яго роўным пластом раскладваем гатовую начынку. Зверху выліваем астатняе цеста і раўнамерна яго размяркоўваем па начынцы.

Адкладзеныя ў асобны посуд смятану і жаўток змешваем і з дапамогай пэндзліка акуратна наносім на цеста для надання будучаму пірагу румянай глянцавай скарыначкі.

Па жаданні зверху можна прысыпаць пірог кунжутам. А яшчэ з морквы можна нарэзаць кветак і такім чынам упрыгожыць наш пірог.

Адпраўляем падрыхтаваную форму ў зага­дзя разагрэтую да 180°C  духоўку і выпякаем да гатоўнасці. Час выпякання залежыць ад памеру формы, таўшчыні пірага і магчымасцей вашай духоўкі.

Пры выпяканні заліўных пірагоў існуе адна асаблівасць: знешне гатовы пірог унутры можа заставацца сырым. Улічвайце гэта! У любым выпадку гатоўнасць пірага правярайце з дапамогай драўлянай шпажкі. Я выпякаў заліўны пірог у духоўцы на рэжыме “верх + ніз” на працягу 1 га­дзіны і пасля праверкі шпажкай дапякаў яшчэ 10 хвілін. Вось цяпер мой пірог гатовы! Дастаём яго з духоўкі. Даём пірагу крыху астыць, наразаем яго, і можна ўсіх клікаць да стала. Раю прыгатаваць, паспрабаваць і атрымаць сапраўднае задавальненне.

Смачна есці!

Рэцэпт ад Сяргея ХАРЭВІЧА.
Фота аўтара.