Закусачны пірог “Восеньскае паляванне”

Вось і прыйшла пара атрымліваць асалоду ад восеньскага ўраджаю. І пакуль зняты ўраджай застаецца самым сакавітым і карысным, трэба яго максімальна выкарыстоўваць. Сёння нічога новага з прадуктаў я не прапаную — гэта будзе бульба і курынае мяса, але тое, што атрымаецца ў выніку, упэўнены, вам спадабаецца і прыемна здзівіць, пакінуўшы ўсіх у поўным захапленні.

Рэцэпт, які я сёння прапаную, у першую чаргу для аматараў мясных страў. Я заўсёды кажу, што не толькі з дарагіх прадуктаў можна згатаваць стравы, якія можна паставіць у цэнтры святочнага стала. Часам з самых звычайных прадуктаў атрымліваюцца вытанчаныя пачастункі, якія здольны выклікаць усеагульнае захапленне. І адным з іх з’яўляецца апетытны бульбяны пірог з курынымі ножкамі. Я яго называю закусачны пірог “Восеньскае паляванне”. Курыныя ножкі, загорнутыя ў бекон, хрусткія, запечаныя ў духоўцы, спадабаюцца ўсім. У гэтым рэцэпце спалучаюцца смачныя курыныя ножкі і бульбяное пюрэ на тоставай аснове з дзіўным водарам.

Пірог вельмі смачны, асабліва ў гарачым выглядзе. Гатуецца хутка. Любая гаспадыня справіцца з гатаваннем пірага, які атрымліваецца не толькі смачным і сытным, але і вельмі прыгожым. З рэцэптам можна паэксперыментаваць: замест курыцы ўзяць вяндліну ці грыбы (лясныя або шампіньёны).

Для гатавання нам спатрэбяцца наступныя кампаненты:

• 5 лустачак хлеба;

• 2 ст. л. алею;

• 2 кг варанай бульбы; 

• 100 г сметанковага масла;

• шклянка цёплага малака;

• 6 яечных жаўткоў;

• соль і перац на смак;

• некалькі галінак пятрушкі;

• 9 курыных ножак;

• 18 палосак бекону;

• па пары сталовых лыжак папрыкі і перцу чылі;

• 100 г цвёрдага сыру.

Перш за ўсё трэба змяшаць папрыку і перац чылі, а затым укачаць у гэтую сумесь папярэдне памытыя і высушаныя курыныя ножкі. Зрабіць гэта трэба так, каб яны былі цалкам пакрытыя прыправамі. Далей бяром тоненькія палоскі бекону і заварочваем іх вакол курыных ножак так, каб на адну ножку пайшло дзве лустачкі мяса. Засцілаем бляху пергаментам, выкладваем курыныя ножкі і адпраўляем у духоўку, дзе курачка ў беконе будзе запякацца 30 хвілін пры тэмпературы 150°C.

Пакуль мяса выпякаецца, бяром вараную бульбу і старанна яе таўчом. Дабаўляем яечныя жаўткі, малако, сметанковае масла, соль і перац, а таксама здробленую пятрушку. Добра змешваем да аднароднай кансістэнцыі.

Калі курыныя ножкі будуць гатовы, вымаем іх з духоўкі. Бяром форму са здымнымі борцікамі (калі няма такой, бярыце любую іншую, напрыклад, у мяне шкляная 27 ´ 27 см), змазваем яе алеем, кладзём на дно лустачкі хлеба, іх таксама абмазваем алеем, а затым адпраўляем у духоўку, дзе яны будуць смажыцца 10 хвілін пры тэмпературы 175°C.

Калі тосты будуць гатовы, форму вымаем і накладваем туды бульбяную сумесь, добра разраўняўшы яе зверху. Затым бяром курыную ножку і ўтыкаем яе ў пюрэ так, каб костачка тырчала зверху.

Утыкаем курыныя ножкі на аднолькавай адлегласці адна ад адной. Тром сыр на сярэдняй тарцы, пасыпаем ім змесціва формы і адпраўляем яе ў духоўку. Пірог будзе запякацца пры тэмпературы 175°С 15 хвілін.

Як толькі вызначаны час скончыцца, форму вымаем з духоўкі, ставім пірог на стол, упрыгожваем зелянінай (па жаданні можна зрабіць папільёткі з паперы і замаца­ваць кожную на канцы костачкі, як паказана на здымку, але можна гэтага і не рабіць, атрымаецца ўсё роўна прыгожа) і клічам усіх паласавацца смачным, сытным і арыгінальным пірагом.

Смачна есці!

Рэцэпт ад Сяргея ХАРЭВІЧА.
Фота аўтара.